صباح | مساء , الأزهار الذابله والأمنيات الخانقه ~
ممكن اتكلم عن قضيه , تكلموا عنها كثير , ومنيب متكلمه عن "وش رايكم في هالشي "
ولا عن الأحكام ورأي الشرع لانه هذا شي لانقاش فيه
لكن حابه اتكلم عن كم نقطه , لازلت مافهمتها أبداً واحسها اشياء مستحيله واتمنى تفكون لي رموزها !
مدخل :
قال صلى الله عليه وسلم { أحب لأخيك ماتحب لنفسك } !
احيانا أشك في أن بعض الأمور لدينا , تبيح المحرمات !
وهناك قضايا لايجوز البت فيها لكن نتفاجأ بأنه سرعان ماتتبدل الأحكام " سبحان الله " !
التلاعب بالمشاعر أصبح من البديهيات !
الموضوع :
كثير اسمع انه زواج المسيار صار امراً طبيعي , وليش تتعجبين طيب ! , بطبيعتي الاشياء الدخيله
آخذ وقت طويل لما يمكن اتقبلها , ويمكن تفشي الأمر وانتشاره يجبرني على استيعابه !
صرت اشوف اي وحده حولي مطلقه يمكن متزوجه مسيار شيدريني ! على اني ماحب اتدخل بخصوصيات من ماكان
بس والله من كثر ماسمعت , الأهم انه في كم نقطه منيب مستوعبتها أبداً !
1- ليش مجتمعنا أباح " للشاب " "قدس الله سره " مالم يبيحه الشارع حتى ! في أمور كثير
" ذنبه مغفور " دائما وأبداً " ! يعني لو يقولون لي عبدالعزيز ولد عمك متزوج مسيار عادي بتعدي
لكن فرضا لو قالوا شذى متزوجه مسيار , بنفجع واتفاجأ ! , يعني ليش انغرست هالمفاهيم في عقولنا حتى ياللي نكرها !
2- الشاب , ليش يتزوج مسيار ! يعني اللي خلاك تتزوج مسيار , صعب يخليك تنشر الخبر ! ماسويت حرام !
طيب ماتغار عليها ! ماتشوفها عرضك ! هالشي مانفكيت افكر فيه شاغلني جد !
يعني ماتفكر انه الناس ممكن يظنون فيها الظنون وانت السبب ! ليش " انانيّن " !
لاحد يقول لي " التكاليف والمصاريف وغيرها " لانها ماعاد صارت حجه مقبوله ,,
3- البنت, لو كانت مطلقه في حالة بقولها طيب منيب متكلمه عنها , بتكلم عن البنت اللي
ماسبق لها الزواج , قد تكون صغيره , وقد تكون في عرف مجتمعنا المُبجل " عانس حتى اشعار اخر " !
بعرف ليش ترضاها لنفسها ! ماتتمنين لنفسك بيت وزوج و أولاد ! ماتتمنين تعيشين حياة طبيعيه
تقولين انا متزوجه وهذا زوجي وهذولي عيالي !
هذا بيتي حياكم الله في اي وقت ! ماتبين مصروف طيب ! اشياء كثير ميب راضيه تخش مخي !
4- في حال انك يافتاه على ذمة " الشاب المغفور ذنبه" وتقدم لك انسان طبيعي وهو اكيد مايدري
انك على ذمة رجل ثاني , وش بتسوين ! هذا التساؤول بالذات يوجع راسي ! بفهم وش تسوي
وخصوصا اذا صار رجل والنعم وماينرد !
فرضا بتتطلقين , وقلتوا اصبر نفكر وكذا وتماطلون شوي , بعد شهر من المماطله قال ابي املك ع الاقل !
وش بيكون الحل !
5- الأهل اتعجب منهم , اذا البنت جاهله او جازفت وسوت شي غلط ماكان المفروض تسويه !
انتم وينكم ! كيف ترضونها لبنتكم ! الجيران اللي حولكم , اذا شافوا واحد غريب يدخل
او بنتكم تركب مع واحد مايدرون مين , وش بيكون موقفكم , اذا بدوا يقولون اشياء موب زينه بحقها !
اتعجب من شي , كثير اقرا شباب في النت يقولون , تتزوجيني مسيار !
طيب ليش يعني , مسيار ياسبحان الله مايحتاج تسأل عنها ولا شي , لكن لو بيكون حب وزواج طبيعي
قبل ماتكنسله اصلا بتشيب في راسها المسكينه ! ولا المسيار يبيح محرماتكم !
ياناس تناقضات محتاجه استوعبها والله
مَخرَج :
تناقضات مجتمعنا تشيب لها العقول !
اسفه اذا موب مرتب , ماقدرت افكر زين حسيت القضيه عجيبه !
يعني عارفه تناقضات مجتمعنا مالها حصر , بس هذا الشي قاعد يدور في راسي مالقيت له اجوبه !
شُكراً لكُل من سَ يعطيني من وقته , ويحاول يفهمني اللي استعصى علي فهمه واستيعابه !
وشكرا للي بيمر ويقرا , يشرفني وجودكم ,,
بالتوفيق للجميع , تحيتي ~
موضوع: تتزوجني..................مسيار 
